我好嬲啊~你地入黎評下理

ah_jai2005

★Tomiko.┐ 發表於 2012-1-24 00:09
其實系E件事上...
我覺得你地兩個都有唔岩的地方~
你細佬咁打喵喵系佢唔岩;}

同意呢位師兄既講法！

我估，其中一個最大問題係你同你細路本身都唔會係平心靜氣坐低慢慢傾果種人，年輕人好少可以做到咁。而你細路唔鍾意隻貓應該都唔係因為呢次跳上張椅先開始，即係話其實佢一路都唔鍾意，但只係無今次咁「明顯」地去表達。(所謂冰封三尺，非一日之寒。)

樓上又不少提到咩打佢、告佢、伸佢出門口果d，好明顯都係講就無敵既說話；雖然出發點都係撐你，但對件事一定唔會有幫助。
一家人住埋一齊，最好可以愛屋及烏，其次係互諒互讓，否則，至少都要嘗試做到互相妥協。

互諒互讓係包括左一種情感上既認同、接受。妥協就係搵一個大家都可以接受既方案，然後作出協議或條件互換。
譬如，你既底線係細佬唔可以郁手打貓，但就要容許細佬用其他方法去保障細佬自己既生活空間。而你細路可能都有某d底線係唔可以既，即管當係隻貓搞佢d野、上佢張床之類(隨便舉例)，咁你就要訓練或者禁制隻貓唔可以咁做，然後當貓貓犯規時要適當地響你細路面前親手處分貓貓，等你細路知你愛貓之餘，都有尊重你細佬既感受。

好多年青人都有個想法：「點解要就佢？！」，但呢句說話除左聽落好似好有氣勢之外，實際上係意氣說話。因為，對方都會諗「點解要就佢？！」。
其實，呢句「點解要就佢？」可以有講到好多個唔同既原因，但最主要原因只有一個，因為講說話果個無絕對權力響度話晒事！！
即使同佢鬧交，佢一樣唔會對貓貓好，你唔響屋企果陣，佢暗地做d咩你都唔會知，只會令貓貓一樣受苦。你知佢唔鍾意隻貓你又唔開心，佢亦只會繼續憎你、覺得你偏幫隻貓，你父母亦見你地成日為隻貓而爭執，只會更嬲同更唔開心！ 如果你父母覺得你地不和係因為養貓，好易想像到父母會點樣解決。
反而，如果你能夠同你細佬達成共識，無論用誠意、親情打動佢，用道理說服佢，用利益收買佢，定係用條件交換，總之，要佢心甘情願去接受同隻貓共同生活，件事先可以做到雙贏，貓貓先可以愉快地生活。