豹B被偷走健康的60日

maxyeung

         小弟從未想過，在新年時從旺角金魚街 (藍招牌) 買左兩隻可愛既豹龜BB之後，竟然徹底改變左我同女友既早上起身返工既時間咁匪夷所思。
           當日響金魚街買左2隻大約40MM左右既豹B之後，不足一個月就雙雙陣亡，原因當然係我同女友根本對飼養呢類型野生響非洲既龜龜常識完全係一竅不通啦，但買龜果日，響果間舖買左好多又貴又唔值錢既養龜用品，冇理由咁快就掉晒佢，又或者送晒俾人。於是，響第2隻龜B死前，已在金魚街另一間好似開張冇幾耐既舖頭買多一隻龜，但當時仍然未累積任何養豹龜既經驗。幸好買既時候發現佢係異常活躍同精神，同有位年輕售賣員也提供左少少養豹龜要留意既東西給我地；但佢唔係SALE 我地多買一些東西的。
          當買入呢隻(第三隻) 豹B後大約5日左右，就出現左呢個討論區最HIT既話題，"我隻龜B唔開口食野，成日訓，四肢冇咩力水"之類既問題喇。
跟住落黎成個星期，都不停去買由呢個討論區既熱心網友所提供既資料，一種又一種適合豹龜B食既草類菜類不斷去嘗試，當然早期買果盒龜糧都會混入，結果係....每況越下。

頭一星期唯一開口食野片段，之後成個幾月冇再認真地開口食野了..........


           由於女友實在太過擔心，而且我又響淘寶網買左D一些價錢公道又實用既燈架及訂造左個細到爆既亞加力膠箱，於是我晚晚都瘋狂上網SEARCH資料，希望呢次有足夠準備去飼養呢隻小龜。幾晚網上搜尋有關資料既結得出兩個，幼體豹龜家中飼養，死亡率約7成，如果響金魚街某些店舖買入的話可達十成，而另一結果係搵到一間有信譽既龜舖叫 "魚婆"。於是當豹B響食最後一次龜糧後約5日後就上去 "魚婆" 度請教一下，希望可以找到方法令呢隻豹B唔好步之前我買果兩隻既後塵。
         經"魚婆" 當日看舖那位店員指點後，我決定嘗試用一隻叫 "CWS" 既藥粉，係中國製，可以有效調理龜類常見既膠胃問題，因為我初步懷疑龜B只係腸胃炎，因為佢D大便好似網上一些人所提供既照片一樣，呈0者哩狀。但因為龜B已完全唔再開口進食，所以不能夠將CWS混入食物讓佢吸收，需要用終極殘暴既方式對付...........針筒濯食。

幸好屋企有兩對手，而且我女友手指纖細，可以固定豹B頭部，所以第一次灌藥比較順利(但都用了超過15分鐘完成)

        
連續灌入CWS藥粉5個早上，呢5日期間豹B唯一營養，只能響早上及傍晚響我地同佢浸REPTOBOOST時，佢飲了少量的"維他命水"，就算草菜龜糧提供充足，龜B都係仍然不聞不問，到了第六日我地又擔心不已，決定再去搵 "魚婆" 問一下店員，我地仲有咩野應變對策呢? 結果買左另一支 "陸龜神物"，BAC (全名自己查字典啦)。


         
              經過一個月，每一日早上都期盼豹B可以開口食野，但失望亦一天一天地延續，卒之響豹B拒食既第50日(龜B唔係捱得餓，只係BAC浸浴令佢產生極大既興趣去飲水入體內，所以先吊得住條小命)，我下定了決心，要對佢進行最後一個策略，進行M藥療程!!! (Metronidazole)。此療程最關鍵既一環，就係份量，我多次重覆去睇番呢個區既一些熱心網友資料，明白份量一定要小心，最理想當然係去獸醫度求醫係最理想，但原則問題所以想再冒一次險，真係不成功，不收費............唔係, 係不成仁~

         灌藥後一日結果...........冇理結果囉。究竟係藥既份量太少，定係有其他因素令龜B拒食呢? 結果我又用左幾個夜晚，爬左呢個討論區共60版，由2011年網友既POST內所有對答，始終無從入手，但仍然隔一日灌入 "M藥" 一次，頭搭尾共6日內分左三次，每日都在靜待結果................

           響對上星期日，距離最後一次灌M藥的第七日，龜B拒食約55日，當我同朋友早上正在網球較量時，收到在家中既女友WHATSAPP，話豹B卒之開口食野喇!!  我知道後既心情非常興奮，感覺不能言喻，兩個月黎唯一記掛既東西卒之有一個好既答案，但明白呢個情況仲要觀察多一段時間，所以我之後返屋企掘番我收埋左兩年果個IP CAM出黎，用黎監視豹B每日動向，有冇食野, 有冇飲野, 最重要係有冇痾野! 結果距離開口進食第5日，豹B越食越狠，越飲越多(加了BAC的水)，越痾越黑! 因此，我真係想響呢度開一個POST描述一下呢兩個月黎我同女友點樣面對豹B拒食又完全睡眠既經過，希望每當網友對自己所養既龜龜出現類似既情況時，可以有一些慰籍，有一些面對問題既決心。

總結:

1) 如果可以既話，我地應該盡量少點用手去觸動龜B，特別在佢仍在睡眠之時。
2) 另外，如經濟訐可既話，盡可能將初病既龜龜帶去獸醫度處理(一置好評土瓜灣某獸醫)
3) 龜B在有正常進食行為後，常常大睡係種正常狀態，通常日間睡後就醒你大/小便一篤以示謝意
4) 關於龜竇SETTING及溫度濕度控制可參考討論區內其他網友既意見

最後好想多謝呢個討論區內多位網友提供資料分享，熱心解答大家既問題及啟發小弟堅持解決病龜B既問題。
名單如下(排便不分先後前後左右粗幼)

版主_
waimannnn
DanDan
Ms turtle
亞力士Wong
地......慾火
Tony_朱
龜MOTHER
忘記網名(青瓜俠)
捌零捌貳零肆_
我愛衝鋒
魚婆
littlefaiyan
AND 所有主動提供龜龜現況及有用資料的網友!!


開始放棄CWS，轉用BAC及REPTOBOOST吊命時，龜B在側陽光下的異常活動狀態~





豹B發育前的細小膠箱及設備






兩個月來買下的毒品


對豹B進行嚴密監視的APPS

maxyeung

今日傍晚時突然又進食，來來回回食野既其中既一段片段


5月2日，卒之有一篤不是白色的既米田共~

maxyeung

大帝: CAM 響黃金商場就搵到喇~
SYRIKON: 唔知將來龜B日子如何，我都希望佢可以長大成人，為國效力!!

maxyeung

我而家認為，響浸水時，當佢有浸個頭落水時，必定會伸起個頭呼吸，響果一刻嘗試滴入鼻，它或多或少會吸一點入體內的，用喉直灌入體內真係對龜B黎講太重手了。

maxyeung

k.k 發表於 2014-5-1 06:29
豹B比較難養，下次要入較大隻D龜

正確，如果我早知道，一定買隻大D囉...........不過貴成倍............

maxyeung

o058276593 發表於 2014-5-1 10:41
看你的饲养环境就知道你的方法有问题

      你對，我的龜箱SETTING 係很錯誤的，但它的居住比例相比我同女友的居住比例已大了很多。如果我居住在千呎豪宅時，也拍張照讓你欣賞一下我有何等富貴好嗎?

   如果我D SETTING 真的完全合乎理想標準，我也不用出POST 相片了吧，就是因為問題多多，才需要清楚一點讓大家知道，再提出問題或建議給大家參考，我真的不希望再有網友心愛龜龜有病時無法處理直至死亡。

maxyeung

地獄火 發表於 2014-5-1 13:03
我想請教你什麼 setting 才叫冇問題，可以 post 相係度比我呢 d 初哥學下野嗎？ ...

下?? 原來閣下竟然係一位初哥?? 咁我之前咪錯信左一位初哥響網頁上既建議?? 大檸樂!!
我而家要拿拿聲幫隻龜扣喉嘔番晒D野出黎先得.............哈~~~

maxyeung

廣州去過一次，很好的地方

maxyeung

兆輝J 發表於 2014-5-1 12:47
加油,夏天易養好多,
呢幾日轉天氣小心保暖.

係啊, 而家已煩惱緊夏天開冷氣既應付方法..........

maxyeung

o058276593 發表於 2014-5-1 13:13
我在广州的，传不了照片。我建议你在豹苗未调理好肠胃前，不好放水盆，不好喂带水的新鲜菜叶。就喂龟粮加草 ...

是啊, 其中兩段片佢爬來爬去及反了車，就是出了問題，當時它沒喝水也沒吃東西一個月了，但水盆也保持了若干濕度。當牠再長大一點，也真的要給牠多些干草，現在只給它槡葉、車前草及少量油墨菜讓它回復胃口先。

maxyeung

地獄火 發表於 2014-5-1 13:43
快 d 還原再 lai 多一次杜原蟲

系統還原，就不如還原到行過金魚街果日喇，都係行去波鞋街好D~

maxyeung

hcwj2000 發表於 2014-5-1 11:14
我養果隻豹b到死左~

我之前已極速死左一對響 "藍招牌" 度買入的...........

maxyeung

兆輝J 發表於 2014-5-1 13:35
唔可以直吹,一流鼻水就敗,
搵個最暖位放,開冷氣就加40W陶膽,記得加濕.

多謝建議!

maxyeung

jc2038 發表於 2014-5-1 19:39
回復 maxyeung 的帖子

非常感動，不離不棄的態度非常值得學習

人人為我，我為人人嘛~